ꤊꤢ꤬ꤛꤢ꤭ ꤜꤟꤤ꤬
ꤒꤟꤢꤧ꤬ꤚꤤ꤬ꤒꤟꤢꤧ꤬ꤊꤛꤢ꤭ ꤔꤢ ꤊꤢ꤬ꤛꤢ꤭ꤜꤟꤤ꤬ꤍꤟꤥ
Orange Door (ꤢꤪ꤬ꤚꤢꤩ꤭ꤘꤢꤪ꤭) ꤒꤢ꤬ꤓꤝꤥꤒꤢ꤬ꤏꤛꤢ꤬ꤡꤝꤟꤥ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤘꤣ ꤢꤨ꤭ꤗꤟꤢꤩ꤬ꤡꤝꤟꤛꤢꤩ꤭ ꤟꤤ꤬ꤖꤢꤨꤖꤛꤢ꤭ꤖꤢꤨ, ꤔꤢ ꤟꤤ꤬ꤖꤢꤨꤖꤛꤢ꤭ꤖꤢꤨ ꤒꤢ꤬ꤟꤢꤩ꤬ ꤘꤣ ꤢ꤬ꤜꤥ꤬ꤙꤢꤧ꤬ ꤒꤟꤢꤧ꤬ꤒꤢ꤬ꤓꤝꤥꤒꤢ꤬ꤏꤛꤢ꤬ ꤘꤣ ꤒꤟꤢꤧ꤬ꤥ꤬ꤗꤟꤥ꤬ꤥ꤬ꤚꤛꤢ ꤢ꤬ꤑꤢꤩ꤭ ꤔꤢ ꤕꤢ꤬ꤡꤟꤢꤧ ꤒꤟꤢꤧ꤬ꤘꤢꤨ꤬ꤓꤛꤢ꤬ ꤢ꤬ꤑꤢꤩ꤭ ꤒꤢ꤬ꤟꤢꤩ꤬ ꤕꤚꤢꤧ꤯
ꤒꤢ꤬ꤖꤟꤌꤣꤒꤢ꤬ꤋꤛꤢ꤬ ꤒꤟꤢꤧ꤬ꤚꤤ꤬ ꤒꤣ꤬ꤡꤣ꤬ꤡꤣ꤬ ꤘꤣ ꤟꤤ꤬ꤘꤢꤪꤊꤢꤨ꤭ ꤙꤢꤧ꤬ꤙꤢꤧ꤬ ꤗꤟꤢꤒꤥ꤬ꤚꤢꤪ ꤒꤟꤢꤧ꤬ꤟꤢꤩꤙꤢꤧ꤬ꤟꤢꤩꤏꤛꤣ꤭ ꤒꤟꤢ꤭ꤒꤥ꤭ꤒꤟꤢ꤭ꤙꤢꤧ꤬ ꤒꤥ꤬ OK ꤒꤥ꤬ ꤚꤢꤪ ꤔꤟꤢꤧ꤬ ꤜꤥ꤬ꤙꤢꤧ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤒꤣ꤬ꤡꤣ꤬ꤡꤣ꤬ ꤔꤢ ꤒꤟꤢꤧ꤬ꤒꤢ꤬ꤓꤝꤥꤒꤢ꤬ꤏꤛꤢ꤬꤯ Orange Door (ꤢꤪ꤬ꤚꤢꤩ꤭ꤘꤢꤪ꤭) ꤥ꤬ꤒꤢ꤬ꤚꤤ꤬ ꤙꤤꤛꤢꤩ꤭ ꤔꤢ ꤊꤟꤢꤦ ꤔꤟꤤꤘꤢ꤭ꤏꤢꤦ꤬ ꤕꤢꤩ ꤔꤟꤢꤧ꤬ ꤚꤢꤪ ꤊꤟꤢꤦ ꤗꤟꤢꤩ꤬ꤡꤝꤟꤥ ꤔꤟꤢꤧ꤬ ꤘꤣ ꤊꤟꤢꤦ ꤒꤢ꤬ꤓꤝꤥꤒꤢ꤬ꤏꤛꤢ꤬ꤡꤝꤟꤥ ꤔꤟꤢꤧ꤬ ꤜꤟꤢꤩꤔꤟꤤꤙꤢꤧ꤬ ꤒꤟꤢꤧ꤬ꤜꤥ꤬ꤙꤢꤧ꤬ ꤙꤢ ꤢ꤬ꤕꤚꤛꤢ꤭ꤒꤢ꤬ꤘꤢꤦ꤬ ꤔꤢ ꤢ꤬ꤐꤢꤨ꤭ ꤢ꤬ꤑꤢꤩ꤭ ꤔꤌꤣ꤬ꤕꤚꤢꤧ꤯
ꤔꤟꤢꤧ꤬ ꤊꤤ꤬ ꤥ꤬ ꤘꤣ ꤒꤟꤢꤧ꤬ꤒꤢ꤬ꤚꤟꤢꤪ꤬ꤞꤢꤧ ꤢ꤬ꤊꤢꤨ꤭ ꤋꤥ꤭ꤑꤟꤢ ꤔꤢ ꤋꤥ꤭ꤑꤟꤢ ꤟꤢꤩꤗꤢ꤬, ꤢꤧꤟꤛꤢ꤭ Triple Zero (ꤚꤢ꤬ꤠꤢ꤬ ꤞꤌꤣ꤭ꤕꤜꤢꤪ꤬) (000) ꤔꤌꤣ꤬ ꤔꤤ꤯
Orange Door (ꤢꤪ꤬ꤚꤢꤩ꤭ꤘꤢꤪ꤭) ꤗꤟꤢꤩ꤬ꤡꤝꤟꤥ ꤙꤢꤧ ꤊꤤ꤬ ꤘꤢ꤭:
- ꤔꤟꤢꤧ꤬ ꤜꤥ꤬ꤙꤢꤧ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤔꤢ ꤗꤟꤌꤣꤖꤢꤧ꤭ ꤒꤟꤢꤧ꤬ꤗꤟꤢꤩ꤬, ꤗꤟꤢꤒꤥ꤬ꤚꤢꤪ ꤔꤟꤢꤧ꤬ ꤙꤢꤧ꤬ꤐꤟꤢꤪ꤬ ꤙꤢꤧ꤬ꤊꤛꤢꤔꤢ ꤒꤟꤢꤧ꤬ꤥ꤬ꤗꤟꤥ꤬ꤥ꤬ꤚꤛꤢ ꤗꤟꤢꤒꤥ꤬ꤚꤢꤪ ꤕꤢ꤬ꤡꤟꤢꤧ ꤒꤟꤢꤧ꤬ꤘꤢꤨ꤬ꤓꤛꤢ꤬ ꤗꤟꤢꤒꤥ꤬ꤚꤢꤪ ꤕꤢ꤬ꤡꤟꤢꤧ ꤓꤢꤨ꤬ꤓꤛꤢ꤬ꤞꤢꤧ꤭ ꤢ꤬ꤑꤢꤩ꤭꤯
- ꤊꤢ꤬ꤛꤢ꤭ ꤒꤣ꤬ꤕꤚꤟꤢꤧ꤬ꤕꤚꤟꤢꤧ꤬ ꤘꤣ ꤢ꤬ꤥ꤬ꤖꤢꤦ꤬ ꤔꤢ ꤔꤟꤢꤧ꤬ ꤚꤢꤪ ꤗꤟꤢꤩ꤬ ꤞꤢꤧꤤ꤬ꤏꤢꤩ꤭ ꤔꤟꤢꤧ꤬ ꤗꤟꤢꤒꤥ꤬ꤚꤢꤪ ꤢ꤬ꤒꤢ꤬ꤘꤝꤥ꤭ ꤘꤣ ꤔꤟꤢꤧ꤬ꤑꤢꤩ꤭ ꤒꤥ꤬ ꤔꤟꤢꤧ꤬ꤗꤢꤩ꤭ꤠꤢꤧ꤬, ꤗꤢꤩ꤭ꤠꤢꤧ꤬-ꤘꤣ ꤢ꤬ꤚꤟꤢꤩꤋꤢꤧ꤭, ꤟꤤ꤬ꤖꤢꤨꤖꤛꤢ꤭ꤖꤢꤨ ꤥ꤬ ꤔꤢ ꤔꤟꤢꤧ꤬ ꤗꤟꤢꤒꤥ꤬ꤚꤢꤪ ꤕꤚꤟꤢꤧ꤬ꤗꤛꤢꤋꤝꤢꤧ꤬꤯
- ꤔꤟꤢꤧ꤬ ꤗꤢ꤬ ꤕꤢ꤬ꤡꤟꤢꤧꤖꤢꤨ ꤗꤟꤢꤒꤥ꤬ꤚꤢꤪ ꤘꤢꤨ꤬ꤓꤛꤢ꤬ꤞꤢꤧ꤭ꤒꤣ꤬ꤕꤚꤟꤢꤧ꤬ ꤚꤢꤪ ꤋꤛꤢꤙꤢꤧ꤬ ꤔꤢ ꤒꤟꤢꤧ꤬ꤒꤢ꤬ꤘꤝꤥ꤭ ꤥ꤬ ꤒꤥ꤬ ꤗꤟꤢꤒꤥ꤬ꤚꤢꤪ ꤜꤥ꤬ꤙꤢꤧ꤬ ꤒꤟꤢꤧ꤬ꤗꤛꤢꤋꤝꤢꤧ꤬ ꤢ꤬ꤑꤢꤩ꤭꤯
- ꤔꤟꤢꤧ꤬ ꤥ꤬ ꤋꤢ꤭ꤜꤟꤢꤩ ꤘꤣ ꤢ꤬ꤒꤢ꤬ꤚꤟꤢꤪ꤬ꤞꤢꤧ ꤘꤣ ꤔꤢꤪ꤭ꤢꤩ꤬ ꤒꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭ꤡꤟꤢꤦ꤬ ꤗꤟꤢꤒꤥ꤬ꤚꤢꤪ ꤥ꤬ꤕꤟꤢꤪꤗꤛꤢꤗꤢ꤬ꤔꤟꤤ ꤒꤟꤢꤧ꤬ꤊꤢ꤬ꤓꤢꤪ꤬ꤥ꤬ꤔꤛꤢ꤭ ꤓꤌꤣ꤭ꤕꤢ꤭ꤚꤢꤪ ꤔꤟꤢꤧ꤬ ꤜꤥ꤬ꤙꤢꤧ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤔꤢ ꤘꤣ ꤒꤟꤢꤧ꤬ꤊꤢ꤬ꤓꤢꤪ꤬ꤥ꤬ꤔꤛꤢ꤭ ꤛꤢꤩ꤭ꤒꤢ꤬ꤟꤢꤩ꤬ ꤘꤣ ꤟꤤ꤬ ꤗꤟꤢꤒꤥ꤬ꤚꤢꤪ ꤒꤟꤢꤧ꤬ꤙꤢꤪꤞꤛꤥꤋꤢꤧꤋꤥ꤭ ꤢ꤬ꤊꤢꤨ꤭꤯
- ꤔꤟꤢꤧ꤬ ꤙꤢꤧ꤬ꤐꤟꤢꤪ꤬ꤔꤟꤤ ꤕꤢꤩ ꤒꤣ꤬ꤕꤚꤟꤢꤧ꤬ꤕꤚꤟꤢꤧ꤬ ꤘꤣ ꤔꤟꤢꤧ꤬ ꤞꤢꤧꤑꤢꤩ꤭ ꤔꤌꤣ꤬ ꤙꤢꤧ꤬ꤊꤛꤢꤔꤢ ꤒꤟꤢꤧ꤬ꤒꤢ꤬ꤘꤝꤥ꤭ ꤢ꤬ꤑꤢꤩ꤭꤯
- ꤔꤟꤢꤧ꤬ ꤏꤤꤒꤣ꤬ꤙꤢꤧ꤬ ꤔꤢꤪ ꤔꤢ ꤟꤤ꤬ꤖꤢꤨꤖꤛꤢ꤭ꤖꤢꤨ ꤒꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭, ꤥ꤬ꤕꤢ꤬ꤒꤟꤣ ꤔꤢ ꤥ꤬ꤕꤟꤢꤪꤗꤛꤢꤗꤢ꤬ꤔꤟꤤ ꤒꤟꤢꤧ꤬ꤊꤢ꤬ꤓꤢꤪ꤬ꤥ꤬ꤔꤛꤢ꤭ ꤞꤛꤢꤔꤢ ꤔꤟꤢꤧ꤬ ꤡꤛꤣ ꤙꤤꤒꤢꤩ꤭꤮ ꤙꤢꤧ꤬ꤙꤢꤧ꤬ ꤒꤣ꤬ꤕꤚꤟꤢꤧ꤬ꤕꤚꤟꤢꤧ꤬ ꤊꤚꤝꤥ꤭ꤗꤛꤢ ꤔꤟꤢꤧ꤬, ꤔꤟꤢꤧ꤬ ꤡꤛꤣꤥ꤬ꤜꤢꤩ꤭ ꤙꤤꤒꤢꤩ꤭ ꤗꤟꤢꤒꤥ꤬ꤚꤢꤪ ꤔꤟꤢꤧ꤬ ꤔꤢꤪ꤭ꤢꤩ꤬ ꤚꤢꤦ꤭ ꤖꤢꤨꤒꤢꤩ꤭ ꤔꤌꤣ꤬꤯
Orange Door (ꤢꤪ꤬ꤚꤢꤩ꤭ꤘꤢꤪ꤭) ꤗꤟꤢꤩ꤬ꤡꤝꤟꤥ ꤙꤢꤧ ꤘꤣ:
- ꤔꤟꤤꤘꤢ꤭ ꤕꤢꤩ ꤔꤟꤢꤧ꤬ ꤓꤌꤣ꤭ꤚꤢꤪ ꤔꤟꤤꤘꤢ꤭ ꤕꤢꤩ ꤔꤟꤢꤧ꤬ ꤒꤟꤢꤧ꤬ꤙꤢꤧ꤬ꤐꤟꤢꤪ꤬ ꤔꤌꤣ꤬ꤒꤢ꤬ꤟꤢꤩ꤬꤯
- ꤗꤟꤢꤩ꤬ꤒꤟꤣ ꤒꤟꤢꤧ꤬ ꤔꤢ ꤘꤣ ꤜꤟꤢꤩꤘꤛꤢꤩꤜꤟꤌꤣ꤭ꤓꤢꤩ꤬ ꤔꤟꤢꤧ꤬ ꤜꤥ꤬ꤙꤢꤧ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤔꤢ ꤒꤟꤢꤧ꤬ꤒꤢ꤬ꤓꤝꤥꤒꤢ꤬ꤏꤛꤢ꤬ꤡꤝꤟꤥ ꤒꤢ꤬ꤟꤢꤩ꤬꤯
- ꤒꤢ꤬ꤓꤝꤥꤒꤢ꤬ꤏꤛꤢ꤬ꤡꤝꤟꤥ ꤔꤟꤢꤧ꤬ ꤒꤟꤢꤧ꤬ꤥ꤬ꤗꤟꤥ꤬ꤥ꤬ꤚꤛꤢ ꤔꤢ ꤕꤢ꤬ꤡꤟꤢꤧ ꤒꤟꤢꤧ꤬ꤘꤢꤨ꤬ꤓꤛꤢ꤬ ꤔꤢ ꤘꤢꤨ꤬ꤓꤛꤢ꤬ꤞꤢꤧ꤭ꤒꤢ꤬ꤟꤢꤩ꤬ ꤢ꤬ꤑꤢꤩ꤭꤯
- ꤗꤟꤢꤩ꤬ꤡꤝꤟꤥ ꤔꤟꤢꤧ꤬ ꤘꤣ ꤜꤟꤢꤩꤗꤟꤢꤩ꤬ ꤒꤟꤢꤧ꤬ꤒꤢ꤬ꤘꤝꤥ꤭ ꤒꤟꤢꤧ꤬ꤒꤢ꤬ꤚꤤ꤬ ꤢ꤬ꤑꤢꤩ꤭ ꤘꤣ ꤔꤟꤢꤧ꤬ ꤔꤢ ꤔꤟꤢꤧ꤬ꤖꤢꤨ ꤒꤢ꤬ꤟꤢꤩ꤬ ꤊꤟꤢꤦ ꤥ꤬ ꤒꤢ꤬ꤘꤝꤥ꤭ ꤢ꤬ꤑꤢꤩ꤭꤯
- ꤕꤜꤝꤥ꤭ꤓꤢꤦ꤭ꤤꤡꤢꤦ꤭ ꤔꤟꤢꤧ꤬ ꤘꤣ ꤢ꤬ ꤊꤟꤢꤦ ꤗꤟꤢꤩ꤬ꤡꤝꤟꤥꤙꤢꤧ ꤔꤟꤢꤧ꤬ ꤔꤢ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤒꤢ꤬ꤟꤢꤩ꤬, ꤞꤛꤢꤔꤢ ꤒꤟꤢꤧ꤬ꤟꤢꤩꤙꤢꤧ꤬ꤐꤟꤢꤨ꤭ꤊꤜꤛꤢ, ꤜꤟꤢꤩꤥ꤬ꤋꤢ꤭ꤜꤟꤢꤩꤋꤢ꤭ꤙꤛꤢ꤬, ꤟꤤ꤬ꤖꤢꤨꤖꤛꤢ꤭ꤖꤢꤨ ꤒꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭ ꤒꤟꤢꤧ꤬ꤒꤢ꤬ꤓꤝꤥꤒꤢ꤬ꤏꤛꤢ꤬ꤡꤝꤟꤥ, ꤞꤢꤧꤕꤜꤢꤪ꤬ ꤒꤢ꤬ꤔꤟꤢꤩ꤬ ꤒꤟꤢꤧ꤬ꤥ꤬ꤏꤛꤥ꤬ꤥ꤬ꤕꤚꤛꤢ꤭ ꤔꤢ ꤒꤟꤢꤧ꤬ꤢꤩ꤬ꤗꤟꤢꤦ꤬ꤥ꤭ꤗꤟꤢꤦ꤬ ꤔꤢ ꤓꤛꤢꤩ꤭ꤏꤤ꤭ꤕꤚꤟꤢꤩ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤒꤢ꤬ꤟꤢꤩ꤬, ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤘꤣ ꤕꤢ꤬ꤡꤟꤢꤧ ꤒꤢ꤬ꤟꤢꤩ꤬ ꤢ꤬ꤑꤢꤩ꤭, ꤚꤢꤦ꤭ꤓꤢꤧ꤭ꤕꤜꤢꤧ꤬ꤗꤢꤦ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ, ꤗꤟꤢꤒꤥ꤬ꤚꤢꤪ ꤒꤟꤢꤧ꤬ꤗꤟꤢꤩ꤬ꤡꤝꤟꤥꤗꤟꤢꤩ꤬ꤊꤥ꤭ ꤗꤟꤢꤜꤢ꤬ꤊꤥ꤭ ꤒꤢ꤬ꤟꤢꤩ꤬꤯
- ꤒꤢ꤬ꤓꤝꤥꤒꤢ꤬ꤏꤛꤢ꤬ꤡꤝꤟꤥ ꤔꤟꤢꤧ꤬ ꤜꤟꤢꤩꤔꤟꤤꤙꤢꤧ꤬ ꤚꤢꤦ꤭ꤗꤢꤦ꤬ꤓꤢꤧ꤭ꤕꤜꤢꤧ꤬ ꤒꤟꤢꤧ꤬ꤥ꤬ꤓꤝꤟꤥ꤭ꤕꤚꤟꤢꤧ꤬ ꤒꤟꤢꤧ꤬ꤜꤟꤢꤪ꤭ꤊꤛꤢ꤭ ꤕꤝꤟꤥ꤭ꤑꤢꤩ꤭ꤒꤢ꤬ꤟꤢꤩ꤬ ꤔꤢ ꤒꤟꤢꤧ꤬ꤜꤟꤢꤪ꤭ꤒꤟꤢꤧ꤬ꤊꤛꤢ꤭ ꤘꤣ ꤢ꤬ꤚꤟꤌꤣ꤬ꤒꤢ꤬ꤟꤢꤩ꤬ ꤢ꤬ꤑꤢꤩ꤭꤯
- ꤗꤟꤢꤩ꤬ꤒꤟꤣ ꤒꤟꤢꤧ꤬ ꤔꤢ ꤔꤟꤢꤧ꤬ ꤘꤣ ꤊꤟꤢꤦ ꤗꤟꤢꤩ꤬ꤡꤝꤟꤥ ꤔꤟꤢꤧ꤬ ꤘꤣ ꤔꤟꤢꤧ꤬ ꤒꤢ꤬ꤊꤜꤛꤢ꤬ ꤊꤤ꤬ ꤔꤟꤢꤧ꤬ ꤥ꤬ ꤔꤢ ꤒꤟꤢꤧ꤬ꤔꤢꤪ꤭ꤢꤩ꤬ ꤒꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭ꤡꤢꤦ꤬ ꤗꤟꤢꤒꤥ꤬ꤚꤢꤪ ꤒꤟꤢꤧ꤬ꤥ꤬ꤕꤟꤢꤪꤗꤛꤢꤗꤢ꤬ꤔꤟꤤ ꤒꤟꤢꤧ꤬ꤒꤢ꤬ꤓꤢꤪ꤬ꤥ꤬ꤔꤛꤢ꤭ ꤘꤣ ꤟꤤ꤬ ꤗꤟꤢꤒꤥ꤬ꤚꤢꤪ ꤘꤣ ꤒꤟꤢꤧ꤬ꤙꤢꤪꤞꤛꤥꤋꤢꤧ꤭ꤋꤥ꤭ ꤢ꤬ꤊꤢꤨ꤭꤯
ꤠꤢ꤭ ꤔꤟꤤꤙꤢꤧ꤬ ꤡꤟꤛꤢ Orange Door (ꤢꤪ꤬ꤚꤢꤩ꤭ ꤘꤢꤪ꤭) ꤖꤢꤨꤒꤢꤩ꤭?
Orange Door (ꤢꤪ꤬ꤚꤢꤩ꤭ ꤘꤢꤪ꤭) ꤙꤢꤗꤥ꤭ ꤙꤤ ꤗꤟꤢꤪꤜꤤ꤭ ꤢ꤬ꤗꤢꤦ꤭ 9 ꤒꤟꤌꤣ ꤘꤣ ꤗꤟꤢꤪꤟꤢꤩ 5 ꤗꤢꤦ꤭ ꤗꤟꤢꤪꤒꤣ꤬ꤑꤢꤩ꤭ ꤒꤟꤌꤣ ꤘꤣ ꤗꤟꤢꤪꤑꤟꤢ꤭ꤑꤢꤩ꤭ (ꤢꤧꤕꤚꤟꤢꤧ꤬ ꤗꤟꤢꤪꤑꤢꤩ꤭ ꤥ꤬ꤊꤟꤌꤣ ꤗꤢ꤬ ꤗꤟꤢꤩ꤬ꤙꤤ)꤯
ꤗꤛꤢꤕꤟꤢꤨ꤭ ꤔꤟꤢꤧ꤬ꤋꤢ꤭ꤜꤟꤢꤩꤋꤢ꤭ꤙꤛꤢ꤬ ꤗꤟꤢꤒꤥ꤬ꤚꤢꤪ ꤕꤥꤎꤢ꤬ꤊꤥ ꤜꤟꤢꤩꤗꤛꤢꤕꤟꤢꤨ꤭ ꤔꤟꤢꤧ꤬ ꤥ꤬ ꤋꤢ꤭ꤜꤟꤢꤩ ꤔꤟꤤꤘꤢꤦ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤢ꤬ꤑꤢꤩ꤭꤯
Orange Door (ꤢꤪ꤬ꤚꤢꤩ꤭ ꤘꤢꤪ꤭) ꤗꤟꤢꤩ꤬ ꤙꤢꤧ ꤡꤟꤛꤢ ꤒꤟꤣ ꤒꤟꤢꤧ꤬ ꤔꤢ ꤔꤟꤢꤧ꤬ ꤊꤤ꤬ ꤔꤟꤢꤧ꤬ ꤔꤢꤪ꤭ꤢꤩ꤬ ꤒꤟꤢꤧ꤬ꤕꤜꤝꤥ꤭ꤓꤢꤦ꤭ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤗꤟꤢꤒꤥ꤬ꤚꤢꤪ ꤜꤥ꤬ꤙꤢꤧ꤬ ꤕꤚꤟꤢꤧ꤬ꤓꤝꤥꤋꤛꤢꤩ꤬ꤍꤟꤥ, ꤥ꤬ꤕꤢ꤬ ꤒꤟꤣ ꤔꤢ Auslan (ꤢꤎꤢ꤬ꤜꤢ꤬)꤯
ꤠꤢ꤭ ꤜꤥ꤬ꤙꤢꤧ꤬ ꤕꤚꤟꤢꤧ꤬ꤓꤝꤥꤋꤛꤢꤩ꤬ꤍꤟꤥ
ꤊꤤ꤬ ꤔꤟꤢꤧ꤬ ꤜꤥ꤬ꤙꤢꤧ꤬ ꤕꤚꤟꤢꤧ꤬ꤓꤝꤥꤋꤛꤢꤩ꤬ꤍꤟꤥ ꤟꤢꤩꤚꤢꤪ ꤘꤛꤢꤩꤞꤢꤧꤑꤢꤩ꤭ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤔꤤ꤯ ꤘꤛꤢꤩꤞꤢꤧꤑꤢꤩ꤭ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤔꤢ:
- ꤔꤟꤢꤧ꤬ ꤖꤝꤥ꤭ ꤔꤢ꤬ꤙꤢ
- ꤔꤟꤢꤧ꤬ꤜꤟꤢ꤭ꤍꤟꤥ
- ꤜꤟꤢꤩꤢꤧꤟꤛꤢ꤭ ꤢ꤬ꤑꤢꤩ꤭ ꤢ꤬ꤒꤢ꤬ꤘꤝꤥ꤭ ꤙꤤꤒꤢꤩ꤭꤯
ꤕꤚꤟꤢꤧ꤬ꤓꤝꤥꤋꤛꤢꤩ꤬ꤍꤟꤥ ꤊꤟꤢꤦ ꤥ꤬ ꤓꤌꤣ꤭ꤚꤢꤪ ꤢꤧꤊꤟꤢ꤬ꤋꤛꤢꤩ꤭ ꤞꤛꤢ ꤔꤟꤢꤧ꤬ ꤕꤢ꤭꤯
Orange Door (ꤢꤪ꤬ꤚꤢꤩ꤭ ꤘꤢꤪ꤭) ꤗꤢ꤬ ꤒꤢ꤬ꤚꤤ꤬ꤥ꤬ ꤕꤢꤩ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤘꤣ ꤠꤢ꤭ ꤑꤢꤩ꤭ ꤟꤟꤢꤧ꤭?
Orange Door (ꤢꤪ꤬ꤚꤢꤩ꤭ꤘꤢꤪ꤭) ꤢꤧꤗꤟꤥ꤬ꤏꤢꤦ꤬ ꤊꤢ꤬ꤛꤢ꤭ ꤔꤢ꤬ ꤥ꤬ ꤙꤢꤒꤢꤩ꤭ ꤙꤢꤧ꤬ꤙꤢꤧ꤬, ꤕꤚꤟꤢꤧ꤬ꤗꤢꤪ꤬ꤕꤚꤟꤢꤧ꤬ꤋꤢꤧ꤭, ꤕꤚꤟꤢꤧ꤬ꤗꤢꤪ꤬ꤕꤚꤟꤢꤧ꤬ꤋꤢꤨ꤭ ꤘꤛꤢ꤬ꤥ꤬, ꤜꤟꤢꤩꤊꤜꤥ꤭ꤜꤟꤢꤩꤋꤛꤢ꤬, ꤔꤢ ꤒꤟꤢꤧ꤬ꤡꤟꤛꤢꤘꤢꤧ꤬ ꤜꤟꤢꤪ꤭ꤕꤜꤤ꤭ ꤒꤢ꤬ꤟꤢꤩ꤬ ꤕꤚꤢꤧ꤯ ꤜꤟꤢꤩꤊꤜꤥ꤭ꤜꤟꤢꤩꤋꤛꤢ꤬ ꤔꤢ ꤒꤟꤢꤧ꤬ꤡꤢꤪꤙꤢꤨ꤭ꤡꤢꤪꤙꤢꤧ꤭ ꤒꤢ꤬ꤟꤢꤩ꤬ ꤔꤌꤣ꤬꤮ꤗꤢ꤬ ꤗꤛꤢꤘꤢꤨ꤬ꤔꤟꤤ ꤚꤢꤪ ꤘꤛꤢ꤬ꤘꤢꤨ꤬ꤐꤟꤢꤦꤑꤟꤢ ꤔꤟꤤ ꤕꤚꤢꤧ꤯ ꤔꤟꤢꤧ꤬ ꤞꤢꤧꤕꤜꤢꤪ꤬ ꤗꤟꤢꤩ꤬ꤒꤟꤣ ꤒꤟꤢꤧ꤬ꤗꤟꤢꤩ꤬ ꤔꤢ ꤕꤚꤟꤢꤧ꤬ꤋꤢꤨ꤭ ꤟꤟꤢꤧ꤭ ꤗꤟꤢꤒꤥ꤬ꤚꤢꤪ ꤕꤚꤟꤢꤧ꤬ꤗꤢꤪ꤬ ꤕꤚꤟꤢꤧ꤬ꤗꤟꤢꤩ꤬ꤒꤟꤢꤧ꤬ꤖꤢꤨ ꤟꤟꤢꤧ꤭ ꤔꤌꤣ꤬ ꤘꤛꤢꤩꤞꤢꤧꤑꤢꤩ꤭ ꤕꤚꤟꤢꤧ꤬ꤗꤟꤢꤩ꤬ꤒꤟꤢꤧ꤬ꤖꤢꤨ ꤔꤤ꤯ Orange Door (ꤢꤪ꤬ꤚꤢꤩ꤭ ꤘꤢꤪ꤭) ꤗꤟꤢꤩ꤬ꤒꤟꤣ ꤒꤟꤢꤧ꤬ꤗꤟꤢꤩ꤬ ꤔꤢ ꤜꤟꤢꤩꤊꤜꤥ꤭ꤜꤟꤢꤩꤋꤛꤢ ꤢꤧꤡꤣ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤒꤢ꤬ꤟꤢꤩ꤬, LGBTI ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤒꤢ꤬ꤟꤢꤩ꤬ ꤔꤢ ꤒꤟꤢꤧ꤬ꤥ꤬ꤘꤢꤥ꤬ꤒꤢ꤬ꤚꤟꤢꤦ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤒꤢ꤬ꤟꤢꤩ꤬ ꤘꤣ ꤊꤟꤢꤦ ꤗꤛꤢꤓꤛꤢꤩ꤬ꤒꤟꤢ꤭ꤏꤢꤦ꤬ ꤔꤢ ꤒꤣ꤬ꤕꤚꤟꤢꤧ꤬ ꤔꤢ ꤒꤣ꤬ꤕꤚꤟꤢꤧ꤬ ꤔꤢ ꤟꤤ꤬ꤖꤢꤨꤖꤛꤢ꤭ꤖꤢꤨ ꤒꤢ꤬ꤟꤢꤩ꤬ ꤒꤟꤢꤧ꤬ꤜꤥ꤬ꤙꤢꤧ꤬ ꤘꤣ ꤢ꤬ꤋꤥꤜꤢꤨ꤭ ꤒꤢ꤬ꤟꤢꤩ꤬꤯ ꤕꤚꤟꤢꤧ꤬ꤗꤟꤢꤩ꤬ꤒꤟꤢꤧ꤬ꤖꤢꤨ ꤊꤟꤢꤦ ꤘꤛꤢꤩ ꤔꤟꤢꤧ꤬ ꤒꤟꤢꤧ꤬ꤚꤤ꤬ꤒꤟꤢꤧ꤬ꤊꤛꤢ꤭ ꤙꤢꤧ꤬ꤊꤛꤢꤔꤢ ꤜꤟꤢꤩꤔꤝꤥꤖꤛꤢꤩ ꤔꤢ ꤗꤟꤢꤩ꤬ꤤꤡꤢ꤭ ꤕꤢꤩ ꤔꤟꤢꤧ꤬ ꤔꤢ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤒꤢ꤬ꤟꤢꤩ꤬ ꤘꤣ ꤔꤟꤢꤧ꤬ ꤜꤥ꤬ꤙꤢꤧ꤬ ꤔꤌꤣ꤬ ꤕꤢ꤭꤯
ꤔꤟꤢꤧ꤬ ꤊꤤ꤬ ꤓꤝꤟꤥ꤭ ꤕꤚꤟꤢꤧ꤬ꤞꤢꤪꤞꤢꤦꤓꤥ꤭ ꤞꤢꤪꤞꤢꤦꤜꤟꤛꤢ꤬ ꤒꤣ꤬ꤕꤚꤟꤢꤧ꤬ ꤗꤟꤢꤒꤥ꤬ꤚꤢꤪ ꤕꤚꤟꤢꤧ꤬ꤙꤢꤧ꤬ꤕꤟꤛꤢꤙꤢꤧ꤬ꤏꤢꤧ꤭ ꤒꤣ꤬ꤕꤚꤟꤢꤧ꤬ ꤗꤟꤢꤒꤥ꤬ꤚꤢꤪ ꤜꤟꤢꤩꤥ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤢ꤬ꤑꤢꤩ꤭ ꤢ꤬ꤥ꤬ ꤒꤥ꤬ ꤙꤢꤧ꤬ꤙꤢꤧ꤬, ꤕꤟꤢꤧ꤬ ꤗꤟꤢꤩ꤬ꤡꤝꤟꤥ ꤙꤢꤧ ꤕꤢ꤭ ꤔꤟꤢꤧ꤬ ꤕꤚꤢꤧ꤯ ꤔꤟꤢꤧ꤬ ꤓꤝꤟꤥ꤭ ꤔꤢ ꤊꤢ꤬ꤛꤢ꤭ ꤘꤣ ꤢ꤬ꤞꤢꤪꤞꤢꤦꤓꤥ꤭ꤞꤢꤧꤞꤢꤦꤜꤟꤛꤢ꤬ ꤒꤣ꤬ꤕꤚꤟꤢꤧ꤬ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤚꤢꤪ ꤞꤢꤧꤤ꤬ꤏꤢꤩ꤭ ꤒꤢꤧ꤭ ꤘꤣ ꤜꤟꤢꤩꤗꤛꤢꤕꤟꤢꤨ꤭ ꤒꤟꤢꤧ꤬ꤘꤛꤢꤩꤡꤝꤟꤥ ꤢ꤬ꤑꤢꤩ꤭ ꤒꤢꤧ꤭ꤗꤟꤢꤩ ꤔꤤ꤯ ꤛꤢꤩ꤭ꤗꤢ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤢ꤬ꤊꤚꤢ꤭ ꤕꤚꤢꤧ꤯ ꤔꤢꤪ꤭ꤞꤢꤧꤑꤢꤩ꤭ Orange Door (ꤢꤪ꤬ꤚꤢꤩ꤭ꤘꤢꤪ꤭) ꤔꤢ ꤔꤟꤢꤧ꤬ ꤊꤤ꤬ ꤞꤢꤧꤐꤟꤢꤦ ꤟꤢꤩꤙꤢꤧ꤬ꤘꤣ꤬ꤑꤢ꤭ ꤔꤟꤢꤧ꤬ ꤢ꤬ꤏꤛꤣꤢ꤬ꤋꤢꤧ꤭ ꤘꤣ ꤒꤢꤧ꤬ꤜꤤ꤬ꤖꤝꤥ꤭ꤊꤢꤨ꤭ ꤗꤟꤢꤒꤥ꤬ꤚꤢꤪ ꤔꤢ ꤊꤢ꤬ꤛꤢ꤭ ꤗꤢ꤬ ꤢ꤬ꤔꤟꤤ꤯
Orange Door (ꤢꤪ꤬ꤚꤢꤩ꤭ ꤘꤢꤪ꤭) ꤊꤤ꤬ ꤙꤢꤗꤥ꤭ ꤒꤥ꤬ ꤊꤤ꤬ ꤟꤢꤩꤚꤢꤪ ꤠꤢ꤭ ꤒꤥ꤭ꤙꤢꤧ꤬ ꤡꤛꤣꤒꤥ꤭ ꤙꤤꤒꤢꤩ꤭?
ꤕꤜꤝꤥ꤭ꤓꤢꤦ꤭ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤘꤣ ꤢ꤬ꤜꤟꤢꤧ꤭ ꤙꤤ ꤢ꤬ꤏꤛꤣꤢ꤬ꤋꤢꤧ꤭ ꤛꤢꤩ꤭ꤒꤢ꤬ꤟꤢꤩ꤬ ꤢ꤬ꤊꤢꤨ꤭:
- ꤕꤚꤟꤢꤧ꤬ꤋꤢꤨ꤭ ꤒꤟꤢꤧ꤬ꤞꤢꤨ꤭ꤡꤛꤣ ꤘꤤ꤭ꤒꤟꤢꤦ ꤒꤟꤢꤧ꤬ꤗꤟꤢꤩ꤬ꤡꤝꤟꤥ 1300 766 491 (ꤗꤟꤢꤪꤜꤤ꤭ ꤢ꤬ꤗꤢꤦ꤭ 9- ꤗꤟꤢꤪꤟꤢꤩ 5 ꤗꤢꤦ꤭ ꤗꤟꤢꤪꤒꤣ꤬ꤑꤢꤩ꤭ - ꤗꤟꤢꤪꤑꤟꤢ꤭ꤑꤢꤩ꤭ ꤗꤟꤢꤪꤜꤤ꤭ ꤢ꤬ꤗꤢꤦ꤭ 9-6 ꤗꤟꤢꤪꤊꤢꤪ꤬ꤒꤟꤢꤪ꤬ ꤔꤢ ꤗꤟꤢꤪꤑꤢꤩ꤭ꤘꤟꤌꤣ꤬ ꤔꤢ ꤢꤧꤕꤚꤟꤢꤧ꤬ ꤗꤟꤢꤪꤑꤢꤩ꤭ꤥ꤬ꤊꤟꤌꤣ ꤒꤢ꤬ꤟꤢꤩ꤬) (ꤕꤚꤟꤢꤧ꤬ꤋꤢꤨ꤭ ꤟꤤ꤬ꤖꤢꤨꤖꤛꤢ꤭ꤖꤢꤨ ꤒꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭ꤡꤟꤢꤦ꤬ ꤟꤢꤩꤙꤢꤧ꤬ꤐꤟꤢꤨ꤭ꤊꤜꤛꤢ ꤔꤢ ꤒꤢꤩ꤬ꤜꤤ꤭ꤖꤝꤥ꤭, ꤒꤟꤢꤧ꤬ꤚꤤ꤬ꤒꤟꤢꤧ꤬ꤊꤛꤢ꤭ ꤔꤢ ꤒꤟꤢꤧ꤬ꤞꤢꤨ꤭ꤘꤤ꤭ꤒꤟꤢꤦ ꤒꤟꤢꤧ꤬ꤗꤟꤢꤩ꤬ꤡꤝꤟꤥ)
- ꤒꤟꤢꤧ꤬ꤒꤢ꤬ꤘꤝꤥ꤭ ꤋꤢ꤭ꤘꤟꤌꤣ꤬ꤋꤢꤧ꤭ ꤗꤢ꤬ ꤒꤟꤢꤧ꤬ꤒꤢ꤬ꤓꤝꤥꤒꤢ꤬ꤏꤛꤢ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤢ꤬ꤑꤢꤩ꤭ ꤘꤣ ꤕꤚꤟꤢꤧ꤬ꤋꤛꤢꤙꤢꤧ꤬ ꤒꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭ꤗꤟꤢꤩ꤬ꤡꤟꤢꤦ꤬ ꤟꤤ꤬ꤖꤢꤨꤖꤛꤢ꤭ꤖꤢꤨ 1800 015 188 (24 ꤗꤢꤦ꤭, ꤒꤣ꤬ꤊꤜꤢꤧ ꤗꤢ꤬ ꤢ꤬ꤑꤢꤩ꤭ 7 ꤑꤢꤩ꤭)꤯ ꤔꤟꤢꤧ꤬ ꤞꤢꤨ꤭ꤟꤛꤢ꤭ ꤤ꤭ꤗꤢꤩ꤭ ꤒꤟꤢꤧ꤬ꤒꤢ꤬ꤘꤝꤥ꤭ ꤋꤢ꤭ꤘꤟꤌꤣ꤬ꤋꤢꤧ꤭ ꤗꤟꤢꤒꤥ꤬ꤚꤢꤪ ꤔꤢꤪ꤭ꤢꤩ꤬ ꤢꤧ꤬ꤞꤤ꤭ live web chat ꤒꤟꤢꤧ꤬ꤒꤢ꤬ꤓꤝꤥꤒꤢ꤬ꤏꤛꤢ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ
- ꤕꤚꤟꤢꤧ꤬ꤋꤛꤢꤙꤢꤧ꤬ ꤒꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭ꤗꤟꤢꤩ꤬ꤡꤟꤢꤦ꤬ ꤕꤚꤟꤢꤧ꤬ꤗꤢꤩ꤬ꤡꤝꤟꤥ ꤢ꤬ꤊꤜꤥ꤭ (ꤕꤚꤟꤢꤧ꤬ꤋꤛꤢꤙꤢꤧ꤬ ꤒꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭ ꤒꤢ꤬ꤟꤢꤩ꤬ ꤔꤢ ꤕꤚꤟꤢꤧ꤬ꤋꤢꤨ꤭ꤘꤢꤨ꤬ ꤕꤚꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭ ꤟꤤ꤬ꤖꤢꤨꤖꤛꤢ꤭ꤖꤢꤨ ꤒꤟꤢꤧ꤬ꤗꤟꤢꤩ꤬ꤡꤟꤛꤢꤩ꤭ꤗꤟꤢꤩ꤬ꤡꤟꤢꤦ꤭) 1800 819 817 ꤗꤟꤢꤒꤥ꤬ꤚꤢꤪ ꤞꤢꤨ꤭ꤟꤛꤢ꤭ꤜꤤ꤬ 0427 767 891 (ꤗꤟꤢꤪꤜꤤ꤭ 8-11, ꤕꤜꤝꤥ꤭ꤑꤢꤩ꤭)
- ꤒꤟꤢꤧ꤬ꤗꤟꤢꤩ꤬ꤞꤢꤦ ꤕꤚꤟꤢꤧ꤬ꤗꤢꤪ꤬ꤕꤚꤟꤢꤧ꤬ꤋꤢꤨ꤭ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤏꤢꤧ꤭ ꤢ꤬ꤊꤜꤥ꤭ ꤘꤣ ꤕꤚꤟꤢꤧ꤬ꤋꤛꤢꤙꤢꤧ꤬ ꤕꤚꤟꤢꤧ꤬ꤗꤢꤪ꤬ꤕꤚꤟꤢꤧ꤬ꤋꤢꤨ꤭ ꤒꤟꤢꤧ꤬ꤗꤟꤢꤩ꤬ꤞꤢꤦ 1800 806 292 (24 ꤗꤢꤦ꤭, ꤒꤣ꤬ꤊꤜꤢꤧ ꤢ꤬ꤊꤢꤨ꤭ ꤗꤟꤢꤪꤑꤢꤩ꤭ 7 ꤑꤢꤩ꤭)
ꤔꤟꤢꤧ꤬ ꤙꤢꤧ꤬ꤙꤢꤧ꤬ ꤗꤟꤢꤒꤥ꤬ꤚꤢꤪ ꤒꤣ꤬ꤕꤚꤟꤢꤧ꤬ꤕꤚꤟꤢꤧ꤬ ꤥ꤬ ꤘꤣ ꤒꤟꤢꤧ꤬ꤒꤢ꤬ꤚꤟꤢꤪ꤬ꤞꤢꤧ ꤊꤜꤢ꤭ꤗꤢꤩ꤭ꤊꤢꤨ꤭ ꤟꤢꤩꤚꤢꤪ, ꤢꤧꤟꤛꤢ꤭ ꤚꤢ꤬ꤠꤢ꤬ ꤞꤌꤣ꤬ꤕꤜꤢꤪ꤬ (000) ꤘꤣ ꤒꤟꤢꤧ꤬ꤓꤝꤟꤥ꤭ꤓꤛꤢ꤬ꤒꤢ꤬ꤗꤤ꤭ꤒꤣ꤬ꤡꤣ꤬ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤥ꤬ ꤔꤤ꤯
ꤒꤟꤢꤧ꤬ꤟꤢꤩꤊꤟꤢ꤬ꤋꤛꤢꤩ꤭ꤏꤢꤦ꤬ ꤔꤢ ꤒꤣ꤬ꤕꤚꤟꤢꤧ꤬ꤒꤟꤢꤧ꤬ꤘꤢꤪꤢꤟꤌꤣ
ꤔꤟꤢꤧ꤬ ꤘꤛꤢꤩꤡꤝꤟꤥ ꤒꤟꤢꤧ꤬ꤟꤢꤩꤊꤟꤢ꤬ꤋꤛꤢꤩ꤭ꤏꤢꤦ꤬ ꤙꤢꤧ꤬ꤊꤛꤢꤔꤢ ꤔꤟꤢꤧ꤬ꤒꤟꤢꤧ꤬ꤏꤤꤒꤣ꤬ꤙꤢꤧ꤬ ꤔꤢ Orange Door (ꤢꤪ꤬ꤚꤢꤩ꤭ ꤘꤢꤪ꤭) ꤚꤢꤪ ꤔꤢꤪ꤭ꤢꤩ꤬ ꤢꤪ꤬ꤜꤢ꤭ ꤒꤟꤢꤧ꤬ꤟꤢꤩꤊꤟꤢ꤬ꤋꤛꤢꤩ꤭ꤏꤢꤦ꤬ ꤜꤤ꤬ꤙꤢ꤬ꤘꤛꤢ꤬ꤓꤛꤢ꤬ ꤙꤤ orangedoor.vic.gov.au/feedback ꤗꤟꤢꤒꤥ꤬ꤚꤢꤪ ꤢꤧꤟꤛꤢ꤭ ꤘꤣ 1800 312 820 ꤔꤢ ꤏꤢꤨ꤬ꤘꤛꤢ꤭ ꤜꤟꤢꤩꤟꤢꤩꤙꤢꤧ꤬ ꤔꤢ ꤕꤚꤟꤢꤧ꤬ꤗꤟꤢꤩ꤬ꤒꤟꤢꤧ꤬ꤖꤢꤨ, ꤕꤚꤟꤢꤧ꤬ꤕꤣꤒꤢ꤬ꤚꤤ꤬ ꤒꤟꤢꤧ꤬ ꤗꤟꤢꤒꤥ꤬ꤚꤢꤪ ꤗꤢ꤬ꤔꤢꤩ꤬ꤡꤢ꤬ ꤔꤌꤣ꤬ ꤔꤤ꤯
ꤕꤟꤢꤧ꤬ ꤖꤛꤢꤩ ꤘꤛꤢ꤬ꤘꤝꤥꤚꤛꤢ ꤒꤣ꤬ꤕꤚꤟꤢꤧ꤬ꤒꤟꤢꤧ꤬ꤘꤢꤪꤢꤟꤌꤣ ꤚꤛꤢ ꤔꤛꤢ꤬ꤡꤢꤪ꤯ ꤕꤟꤢꤧ꤬ ꤔꤢꤪ꤭ꤢꤩ꤬ ꤔꤟꤢꤧ꤬ ꤒꤟꤢꤧ꤬ꤚꤤ꤬ꤒꤟꤢꤧ꤬ꤊꤛꤢ꤭ ꤖꤢꤨꤒꤢꤩ꤭ ꤚꤢꤪ ꤜꤟꤢꤩꤗꤛꤢꤕꤟꤢꤨ꤭ ꤓꤢꤩ꤬ ꤢ꤬ꤑꤢꤩ꤭, ꤋꤛꤢꤞꤢꤧꤘꤥ꤭ ꤗꤛꤢꤟꤛꤢ꤭ ꤘꤣ ꤕꤟꤢꤧ꤬ ꤒꤣ꤬ꤕꤚꤟꤢꤧ꤬ꤒꤟꤢꤧ꤬ꤘꤢꤪꤢꤟꤌꤣ ꤕꤢꤪ꤬ꤜꤢ꤬ꤎꤤ꤬ ꤔꤌꤣ꤬ ꤔꤤ꤯
